Heute im Blog ein Foto von Marcel Michaelis, für alle die Leser die gern sehen möchten von wem denn die Kurzgeschichten und Gedichte stammen, und eine weitere Kurzgeschichte von ihm mitsamt einem Gedicht:
Marcel Michaelis
Blaue Flecke forn Paar Fennje
Im Jejnsatz zu heite wo mor manches ma nich weeß woher mit de Piepen, de Meise oder `n Zaster, jabs frieher ma ne Zeit wo se eens Jeld fors Nischttun hinnerher jeschmissen hamm. S´ Eenzije was mor dafor machn mußte, war sich ` n Sonnahmnd Vormittach frei zu nähm un sich fleißich zu bicken. Ich weeßes noch janz jenau, als obs erscht een Paar Tare her is, wie ich mich so in meine Jurend als 10 jährijer Dessauer Sonnenkopp, mein Taschenjeld uffjebessert hawwe. Un mich daruff, de janze Woche iwwer jefreit hawwe. Awwer ooch weil ich da nich in de Schule mußte. So bin ich fast an jedn Sonnahmd frieh nahs Rathaus jeloofn um mit de Konkurenz von bahle dreißich Kinner, de Fennje un Jroschens uffzusammeln, die de Brautleite mank de jurendliche Meute jeschmissn hamm. Heitzutare sieht mors ja nur noch janz seltn, wie dor Bräutijam wenne mit seine frisch anjetraute Frau de Treppe vons Dessauer Rathaus runnerkommt, sich in de Rockficke langet un ne Forsche voll Kleenjeld rauslangt un in de Menge wirft. Awwer in de 80zijer Jahre, da war das noch sowas wie ne Traditzjon jewesn un es war ooch noch nich dor Jeitz in de Herzen von de Menschn zu schpiern. Un schon jarnich an sonn Tach. So jenau weeß ich das nuh awwer jarnich mehr, wann se mit de erschte Trauung bejonn hamm. Ich jlowwe awwer mich zu arinnern, dasses so frieh um neine jewesn sinn muß. Jednfalls war wo immer an jutes zwee Dutzend Kinner wie sonn Schwarm lästje Fliejn un das bei jedn Wetter for de jroße Treppe vons Rathaus vorsammelt um sich dann wie de Assjeijer uff de Aluminjum-Münzen zu schtarzen. Een Paar von de Jungens un ooch ich hadden mit de Zeit, sowas wie een musikalisches Jeheer entwickelt. Nämlich jenau rauszuherrn wohin de jroßn Jeldschticke uffs Koppsteenflaster jefalln sinn. Dor Klang von de messingfarmnen zwanzich fennje Schticke konnte een jutes Ohr leichte rausherrn. Doch mits herrn alleene, warsch noch lange nich in de Hosnficke. Een jutes Ore mußte mor dazu ooch noch hamm un voralln schnelle Beene. De beste un sicherste Art an de Meise zu jelangn, awwer ooch de schmerzvollste war de Torwartmethode. Mor schtarzte sich eemfach längelank uff de Schtelle wo mor jlowwete, s` Jeld zuletzt jesähn zu hamm. Meestnteels jink das ja ooch janz jut un mich hamm meine Sinne nur seltn jetäuscht. Doch wenn zwee`e von de Assjeijer na de selwe Schtelle jehoppt sinn, oohh dann haddes schon manchesma an de Köppe jekracht. Un da ooch schon zu zu de damalije Zeit de Freindschaft beis Jeld uffheerte, simmer da nich immer zimperlich mittnnanner umjejang. Da floss so manche Träne, awwer nich wie een Paar Meter weiter vor Freede. Un jerade in` nen Sommer mit de kortschn Hosn, da hadde sich so mancher de Kniescheim uffjeschlahn un is heilnd widder nah Heeme jeloofn. Doch trotz manchor blauer Flecke un Schirfwundn wars immor an Fetz jewesn, wenn widder een Brautpaar de Treppe lenkrunner jekommn is. Da hat denn de janze Meute wie im Chor uff Kommando losjebrüllt "se komm, se komm, se komm". Im selwen Oorenblick suchte sich nuh jeder an passenden Platz for de kommende Sammelakzjon. Doch das jink nich jerade jeordnet zu, da war de Trengeleie mant vill schlimmer jewesn als wie heite bei `n erschten Tach vonnen Sommerschlußvorkoof bei Karschtadt. Wie kortsch vorher wenn se innen Leipzjer Zoo de Lähm jefittert hamm.. Doch das war noch jarnischt, weil de Rangelei erscht richtich losjink nachdem dor Jeldrejn uff Jrund von de Erdanziehung widder zurück uff de Erde jefalln is. Ville saren ja heite das mor frieher nich so ville Stress jekannt hamm un ooch dor Schpruch Zeit is Jeld war damals nich so aktuell jewesn wie heitzutare. Doch eens weeß ich heite, daß das for uns Kinner een janz scheener Stress jewesn is. Denn wer da nich ne flinke Hand un een jeschtrecktn Ellnboren jehabt hadde, den hatte de Konkurenz wie innen tiefstn Kapitalismus keene Schance jelahssn. Denns Jelduffsammeln is mit de Zeit sonn richtjer Wettschtreit jeworrn un de Schpielrejeln schtammtn nich von de sozjalistische Moralerziehunk. Ooh lieber Erich was hamm mir doch jesindicht. Un wer zum Schluß n meestn Zaster in de Tasche hadde, der war natierlich dor Jreeste an den Tach jewesn. Doch dafor jabs keene Medallje un ooch keene Urkunde, sondern nur ne Menge neidische Blicke von de annern Kinner. Vorallen de janz kleenen die sinn warklich nur mit een paar Fennje nah Heeme jejang. Nach so unjefähr 10 Brautpaare war dann dor janze Truwel widder vobei. Da hadde mor nuh zwee Hosentaschn voll mit de Aluschips un die wollte nuh jeder innen Schein inwechselt hamm. Un da war de nächste Meechlichkeet jlei um de Ecke innen Ratskellor jewesn. Dor Kellner hinnern Treesn is immer bahle wahnsinnich jeworrn, wenn da sonne Horde Fennichsammler rinjeschtirmt kamm um ihrte Fennje un Jroschens inzutauschn. Awwer nich mehr als wie zwee`e von de Jeldsammler hadden das Jlicke ihrte Fennje ooch jlei loszuwern. Die meestn mußten ihr Jeld nahn Bäcker bring, der `s kleene Jeld immor jarne jenommn hat. So hawwich mich uff die Art jedn Sonnahmd zwischn zehn un fuffzn Mark dazuvordient, inklusiwe blauer Flecke forn Paar Fennje.
Hochzeet
Wenn fors Rathaus Hochzeet war,
Denn jabs vor de Kinner Zaster.
Un wejn de jroße Schturzjefahr,
For manches Knie ooch Pflaster.
Nich nur de Fennje rolltn,
Un nich immer Freidestränen.
Alle was vom Zaster wolltn,
De Jroßn wie de Kleenen.
Jelatscht, jedrengelt un Jeschupt,
Nischt mit briederliche Volksmoral.
De Jroßn hamm de Kleen behupt,
Doch ooch die, die larntn das ma.
Da jabs nischt mit Nächstnliewe,
Da dachte jeder nur an sich.
Blaue Flecke jabs vor alle inklusiewe,
Jedn Sonnahmnd wöchentlich.
Keine Kommentare:
Kommentar veröffentlichen